المكونات الاساسيه لخطوط نقل الكهرباء
بص ياسيدى احنا اتكلمنا فى المقالات السابقه عن بعض المكونات الاساسيه للخطوط الهوائيه.
اتكلمنا عن الابراج بالتفصيل وده ياسيدى فى مقال خطوط نقل الكهرباء - مكوناتها - وانواعها ممكن تروح تتطلع على المقال ده تانى من هنا
وكذلك اتكلمنا عن العازلات وده برده ارجع للمقال بتاع العازلات الكهربيه انواعها فى خطوط نقل الكهرباء وممكن تتطلع عليه من هنا
فى المقال ده بقا هنتكلم عن مكون اخر ألا وهو الموصلات
بص ياسيدى ركز معايا ووحده وحده كدا.....
حضرتك لما بتشوف الخطوط الهوائيه وانت مسافر او خطوط قريبه منك بتشوف موصلات اللى هى يعنى اسلاك؟؟
احيانا بتشوف الاسلاك دى عباره عن كل سلكه لوحدها
واحيانا بنشوف خطوط كل سلكتيين مع بعض
واحيانا بنشوف اربعة سلكات مع بعض
ايه ياعم اللخبطه دى ......
وحده وحده مافيش لخبطه ولا حاجهحضرتك لو مش متخصص هتحس ان ايه ده.....
هاقول لحضرتك لما تشوف سلكه واحده معناها ان ده خط شايل جهد متوسط مثلا ٦٦ كيلوفولت او ١١ كيلوفولت
لما تشوف كل سلكتين جنب بعض ده غالبا بيكون خط ٢٢٠ كيلوفولت
ولما تشوف كل اربعة سلكات مع بعض ده غالبا بيكون خط شايل جهد فائق مثلا ٥٠٠ كيلوفولت
وده غالبا بيكون الاكثر انتشارا ولكن هناك خطوط ٥٠٠ كيلو فولت ولكن كل سلكتين مع بعض والتمييز هنا هيكون عن طريق شكل البرج واتكلمنا عنه فى المقال بتاع الابراج ارجع شوفه
وكذلك ممكن خط ٢٢٠ كيلوفولت يكون كل سلكه تكون لوحدها وبردو التمييز هيكون عن طريق شكل البرج ارجع شوف مقال الابراج تانى
يعنى من الاخر الموصلات بيتم تصميمها على حسب انه هيقدر ينقل قدرة اد ايه وارجع شوف مقال نقل القدره الكهربيه من هنا
اوعى تكون فصلت لا اصحى كده وركز معايا....
من الاخر خليك فى الاكثر انتشارا عشان متتلخبطش وتدخل فى قصة تصميم وغيره
الموصلات
هى عباره عن جدايل غير معزوله وتكون عباره عن طبقات من الجدايل دى فوق بعضها.العوامل التى تؤثر على اختيار الموصل
- التوصيليه للموصل يجب ان تكون كبيره ليه ياعم الحاج لان كل ماتكون التوصيليه كبيره يكون افضل عشان نزود كفاءة نقل القدره الكهربيه بدون ما نفقدها.
- وزن الموصل لابد ان يكون فى الاعتبار طبعا ياسيدى عشان ده بيأثر فى اختيار الابراج وغيره يعنى من الاخر الموصل يكون خفيف.
- مرونة الموصل لابد ان نختار الموصل ذات المرونه العاليه عشان نحمى الموصل من الكسر.
- التمدد الحرارى اه التمدد لابد ان يكون قليل حتى يتم تجنب التمدد للموصل . عشان لو حصل تمدد للموصل افندى هيسبب مشاكل خطيره جدا زى مثلا هيزود الترخيم مابين الابراج ودى كارثه طبعا
انواع المواد المستخدمه فى صناعة الموصلات للخطوط الهوائيهOHTL
- النحاس Copper
- الالمونيوم AL
- سبيكة الالمونيوم AAL
- الالمونيوم المقوى بالصلب ACSR
طبعا عشان نستخدم اى ماده من دول لازم نطبق العوامل عليها التوصيليه ووزن الموصل والمرونه والتمدد الحرارى اللى اتكلمنا عليهم من شويه
يتم استخدام كل هذه الانواع الان ....هناك اعتبارات اخرى زى طول الخط اد ايه ...وغيره وغيره
ويعتبر ACSR هو الافضل بينهم حيث يتم استخدامه بكثره فى صناعة موصلات الخطوط الهوائيه OHTL
ويعتبر هو عباره عن جدايل من الالمونيوم ويوجد طبقه داخليه من الصلب المجلفن
وهذا النوع له احجام ومقاسات محدده ومعروفه Standard
يعنى معروف جدايل الالمونيوم اد ايه وكذلك جدايل الصلب المجلفن اد ايه فى كل نوع منهم حلو كده ولا ايه..
والاختيار ما بينهم بيكون على الجهد المنقول
خلى بالك بيتم تفضيل هذا النوع ACSR عن باقى المواد وذلك لان يعتبر افضل بالمقارنه بالمواد الاخرى من حيث
التوصيليه، الوزن،التمدد الحرارى،المرون
وبالتالى باستخدام ACSR
- تكون التكلفه اقل
- تقليل عدد الابراح فى الخط لان الموصل خفيف والمسافه بين الابراج يمكن زيادتها
- تكلفة الخط بالكامل تعتبر قليله
26AL-7steel
وهذا النوع الاسم التجارى بتاعه ال DOVE
اتمنى نكون استفدنا لو معلومه واحده اشوفكم المقال الجاى انتظرونى..........
إرسال تعليق
0 تعليقات
نرجو عدم نشر التعليقات المسيئه وعدم نشر روابط مخصصه خارجيه