بص ياسيدى طبعا سيادتك عايز تعرف دلوقتى ازاى بيتم نقل القدره الكهربيه من اماكن انتاحها وهى محطات توليد الطاقه الكهربيه واللى اتكلمنا عنهم باستفاضه فى المقالات السابقه ولو ماشوفتهمش ارجع شوفهم وسوف نتكلم فى اشياء كثيره قادما منها أنواع أبراج الكهرباء
تركيب أبراج الكهرباء
ابراج نقل الكهرباء
انواع ابراج نقل الكهرباء
تصميم ابراج نقل الكهرباء
مكونات أبراج الكهرباء
مكان ابراج الكهرباء
غسيل ابراج الكهرباء
ضرر ابراج الكهرباء
صيانة ابراج الكهرباء
ما هى انواع خطوط نقل الكهرباء
1- احيانا بيتم النقل للكهرباء باستخدام الكابلات الارضيه بس ده يعنى استخدامها بيكون فى حالات معينه زى مثلا داخل مدينه او الخط الهوائى معدى على منطقه حيويه..المهم وبعدين الكابلات الارضيه تكلفتها عاليه جدا عشان كده بيفضل النوع التانى
2-يتم نقل الكهرباء عن طريق الخطوط الهوائيه ودى بقى يتم استخدامها بكثره لان تكلفتها بالمقارنه بالكابلات الارضيه تعتبر ارخص وكذلك اسهل فى صيانتها بالمقارنه بالكابلات
تعالو بينا نتكلم عن النوع التانى والاكثر شيوعا واستخداما وهو نقل الكهرباء عن طريق الخطوط الهوائيه
انت عارف وانت مسافر مثلا بتشوف عمدان معدنيه اشكال مختلفه الكبير والصغير الطويل والقصير...اه مسألتش نفسك ليه شكلهم كده وعلى اى اساس بيختلفوا هاقول لحضرتك ليه وازاى وعلى اى اساس بس المطلوب منك تركز معايا قشطه كده يالا بينا
المكونات الاساسيه للخطوط الهوائيه OHTL
- الابراج Towers
- العازلات Insulators
- الموصلات Conductors
- الملحقات Accessories
1-الابراج Towers
الابراج هى دى بقى اللى بتشوفها وانت مسافر مختلفة الاشكال االاحجام.
تعتبر هى اللى بتشيل الموصلات عشان تسلم القدره الكهربيه من مكان الى مكان اخر .
وخلى بالك بقى بتختلف طريقه تصنيع الابراج على حسب هى هتشيل جهد اد ايه وهتمشى مسافه اد ايه وده طبعا بيبقى له تصميمات معينه ماشى كده ولا ايه ..ولا ايه
تنقسم الابراج الى نوعين
1-نوع بينقل الجهود المنخفضه 380V,11KV ودى بقى جهود التوزيع يعنى دى الابراج اللى بتبقى قريبه من المناطق السكنيه عشان توزع الكهرباء على الناس الحلوه.
والابراج دى بقى بتبقى مصنوعه من الخرسانه واحيانا من الخشب وعشان هى بتمر فى القرى والمناطق السكنيه بيبقى حجمها صغير وكذلك المواد التى تصنع منها بسيطه بعض الشئ وطبعا بتنقل جهد منخفض..ايه الاخبار فاهم حاجه..
2- نوع بينقل الجهود المرتفعه مثل 66KV , 220KV , 500KV...وده بقى بيبقى مصنوع من المعدن المجلفن Steel ودى غالبا تحتاج لمساحات واسعه وذلك لان هيكلها المعدنى بيبقى كبيير ..
نوعية المعدن المستخدم فى انشاء الابراج ذات الجهود العاليه او المرتفعه ركز معايا
المعدن ده هو عباره عن معدن مجلفن عباره عن زوايا مربوطه مع بعضها بصواميل وبلتات بس خلى بالك بقى ان التصميم او بمعنى اصح شكل البرج بيعتمد على
- جهد الخط
- عدد الدوائر على البرج
- نوع الموصل ومساحة المقطع
- المسافه بين الابراج
- المسافه بين الفازات
يتم تقسيم الابراج على حسب وظيفة كل واحد
- برج تعليق
- برج شد
- برج زاويه
- برج تبادل
- برج نهايه او برج بدايه.
- التعليق وظيفته انه بيشيل الموصل وشكل العازل راسى او عمودى يعنى.
- الشد وظيفته ان بيحمل حمل الشد فى الموصل والعازل بياخذ شكل افقى خلى بالك ان كل 9 ابراج تعليق تقريبا يوجد برج شد.
- برج الزاويه وظيفته انه بيغير مسار الخط او اتجاهه بزاويه 45 او بزاويه 90 على حسب مسار الخط.
- برج البدايه او برج النهايه للخط ده بيوجدفى بداية الخط وكذلك فى نهايه الخط وده بيتم دخوله على البورتالات فى المحطات هتقولى ايه بورتالات دى هاقولك متستعجلش هنتكلم عنها بعد كده بس اعرف اسمها بس دلوقتى.
- برج التبادل وظيفته هى تغيير مكان الفازات مع بعض على طول الخط عشان يحصل توازن فى المفاقيد على طول الخط لكل الفازات وعدد ابراج التبادل بيكون 3 ، 6 ،9 ،..... لانه لابد ان تكون الفازات التى يبدأ بها الخط ينتهى الخط بنفس الترتيب.
مثال تانى على الابراج التى تحمل 220KV
خلى بالك بيبقى لها نفس التصميم والخواص والانواع بس الفرق ان الارتفاع بيبقى اقل والوزن برضو اقل وهناك فرق اخر ان كل فازه بتبقى على جناح لوحدها
وله نفس انواع الابراج
- تعليق
- شد
- زاويه
- تبادل
- برج بدايه او نهايه
ما هى انواع القوى التى تؤثر على الابراج؟
يوجد ثلاثة انواع من القوى التى تؤثر على الابراج وهذه القوى تعتمد على مكان البرج فين فى الخط والشد فين بردو فى الخط
- قوى راسيه Vertical Force
- قوى افقيه Horizontal Force
- القوه المماسيه Longitudinal Force
اشوفكم المقال القادم ومعلومه سهله وبسيطه انتظرونى...
إرسال تعليق
0 تعليقات
نرجو عدم نشر التعليقات المسيئه وعدم نشر روابط مخصصه خارجيه