العازلات الكهربيه انواعها فى خطوط نقل الكهرباء

احنا طبعا اتكلمنا عن الابراج بالتفصيل فى المقال السابق تعالو بينا نكمل مكونات خطوط نقل الكهرباء 

بص ياسيدى حضرتك لما بتشوف الابراج بتشوف فيها حاجه لونها اسود او رصاصى او زجاج..ياترى بتسأل نفسك هى ايه دى وبتعمل ايه تعالو نعرفكم ايه هى وليه بتستخدم

هى دى اسمها العازلات خلى بالك انا عايز انقل الكهرباء صحيح بس فى نفس الوقت لازم احافظ عليها فى الموصل يعنى بمعنى اصح متوصلش لجسم البرج عشان جسم البرج متوصل بالارض لو وصلت بالارض هنفقد الكهرباء طبعا عشان مقاومه الارض صغيره جدا فالتيار بيروح للمقاومه الصغيره ولا اقولك متشغلش بالك بالقصه دى اعرف بس ان العازل وظيفته منع الكهرباء اللى فى السلك انها توصل لجسم البرج

وظيفة العازلات

1. عزل الموصل عن البرج زى ما قولنا
2. تحمل الحمل الميكانيكى يعنى تحمل وزن السلك وكذلك الشد اللى فى السلك..قشطه كده ولا ايه

المواد المستخدمة فى صناعة العازلات للخطوط الهوائيه

1. البورسلين وده بقى بيكون مصنوع من مادة السيراميك وهذا النوع بيستخدم بكثره وبيستخدم فى كل خطوط نقل الكهرباء الهوائيه ولكل الجهود الكهربيه المختلفه وليه بقى بيستخدم بكثره وذلك لكفاءته العاليه والتكلفه قليله بالمقارنه بالعازلات المطاطيه ولكن العيب الرئيسى فى هذا النوع من العازلات انه بيحتاج الى التنظيف باستمرار اه التنظيف هتقل ازاى يتنظف مع الكهرباء هقولك دا بيحصل بس بشروط معينه مش لازم تشغل بالك المهم تعرف المعلومه طبعا ده بسبب الاتربه اللى فى الجو ليه بيتنظف لان التراب ده بيقلل من كفاءة العزل وبيعمل مسار تسرب ولا اقولك ما علينا                                                 
2. الزجاج هذا النوع لا يستخدم بكثره ويتم استخدامه فى المناطق الاقل تلوث.                                                             
3. المطاط اللى هو بمعنى اصح السليكون هو عباره عن مواد مركبه يتم استخدامه بكثره الان لانه اثبت جداره وكفاءه عاليه خاصتا فى المناطق التى يوجد بها تلوث عالى وكذلك لا تحتاج الى التنظيف يعنى بمعنى اصح التلوث لا يؤثر على كفاءة العزل ويمكنها تحمل التلوث بدون تنظيف لفتره طويله جدا تصل الى 15 عام

Creepage distance

هى المسافه المطلوبه من ماده العزل لمنع تيار التسرب وهو التيار اللى ممكن يمر من خلال العازل ويوصل لجسم البرج وده طبعا احنا مش عايزنيه يحصل وبالتالى بنحسب العزل قد ايه عشان نمنعه انه يمر cm/kv يعنى محتاج كام سم من العزل لكل كيلو فولت وخلى بالك المسافه دى بتتغير من مكان الى اخر على حسب معدل التلوث فى المكان

مثال فى المناطق الساحليه والمناطق الصناعيه creepage distance حوالى 4.5cm/kv والمناطق الصحراويه تكون ال creepage distance حوالى 3cm/kv

 Flash over التفريغ الكهربى

وظيفة العازل الرئيسيه هى عزل الموصل طبعا عن جسم البرج وكذلك منع اى تيار تسرب يمر لجسم البرج بس برغم كل الاحتياطات دى ممكن ده يحصل ويمر تيار تسرب لجسم البرج عن طريق الاتربه التى توجد على العازل ولو ده حصل بيحدث كسر كهربى للعازل يعنى بيحصل عليه تفريغ كهربى وبالتالى بيتم فصل الدائره وده بنسميه تفريغ كهربى او Flash over

عرفنا بقى فايدة تنظيف الابراج من التراب ايه  واخدين بالكم انتم غسيل ..جافه.. لا لا متشغلش بالك دا سييم هما فاهمينه

انواع العازلات

1. Cap and Pin ممكن يصنع هذا النوع من البورسلين او الزجاج. 
   
   
   
   
   
   
                                        

2-Long Rod ممكن يصنع من البورسلين او المطاطى

 

تنقسم العازلات الى

1. عازلات تعليق.Suspension insulators                        ودى بتكون اما مفرد او مزدوج او تأخذ شكل حرف V                 
   
   
   
   

2-عازلات الشد  Tension insulators ودى بتكون مفرد او مزدوج

3-عازلات طرد Support insulator        

قرن التفريغ arcing horn

وده ملحق بيكون متركب على العازل وظيفته عمل توزيع للجهد على العازل لحماية العازل وكذلك حماية الطبق الاول من الجهد الزياده وكذلك حمايه العازل من التفريغ الكهربى Flash over

وقرن التفريغ ده او بنسميها حلقة الحمايه تعمل على وجود سعه بين الجذء المعدنى اعلى الطبق فى السلسله وحلقة الحمايه فيحدث تلاشى للسعه التى تنشأ بين العازل وجسم البرج وبهذه الطريقه يتم توزيع الجهد على الاطباق للعازل بإنتظام 

لزيادة كفاءة السلسه 

عندما يقل جهد الطبق الملامس للموصل تزداد كفاءة السلسه وكذلك عن طريق الاتى 

1. زيادة طول ذراع البرج
2. عن طريق تدرج العوازل
3. استخدام حلقات الحمايه وهذه هى التى تستخدم فى الحياه العمليه وتعتبر افضل طريقه لتقليل الجهد الملامس للموصل 

اتمنى نكون اتعلمنا حاجه جديده اشوفكم فى معلومه جديده سهله وبيسطه انتظرونى..