ادارة الازمات ..تعالو نشوف حكاية اللبن..اه اللبن ..

عن ادارة الازمات نتحدث

 

كان ياما كان..لا لا ايه الجو ده لا بجد نركز شويه فى القصه عشان احنا هنطلع منها بالهدف من المقال 
بص ياسيدى في واحد صاحبنا كل يوم لما يصحى من النوم هو واسرته متعودين دايما يشترو لبن ويعملو شاى بلبن ..

طبعا بتكاته وحركاته حلو كده لحد دلوقتى تمام 
فى يوم صاحبنا مراته تعبت فقام صاحبنا الهمام جاب اللبن وحطه على النار وسابه ودخل عند مراته يقولها مش عايزه حاجه يابيبى..قالت لا يابيبى وفجأه قالت له مش شامم ريحة دخان قالها لا لا مافيش حاجه
صاحبنا قعد شويه يرغى مع مراته وبعدين طلع .وهو طالع شاف دخان طالع من المطبخ الاستاذ دخل المطبخ لقى الدنيا باظت اللبن اتحرق والحله اتهببت...المطبخ ولع ياجدعان
طبعا صاحبنا ما جبش سيره لمراته وقام ماسك الحله وظل يغسل فيها لحد ما خلاها بتلمع وبعدين نزل اشترى لبن تانى وعمل الشاى بلبن وشربو هو واولاده يلا بالهنا والشفا يابيبى
نعم نعم ايه قصة اللبن وصاحبنا وعلاقتهم بالموضوع احنا هنلعب ولا ايه ..لا مش هنلعب
قراءت القصه كويس تعالو نشوف استفدنا ايه منها

المراحل التى تمر بها اى ازمه

خد بالك مراحل اي ازمه خمسة مراحل خلى بالك ياجميل فيه اتنين بيحصلو ومازالت الازمه لم تحدث وتلاته بيحصلو بعد وقوع الازمه تعالو نشوفهم ونطبقهم على قصة صاحبنا

1. اكتشاف اشارة الانذار المبكر للازمه واستغلالها.                 وده بالفعل حصل مع صاحبنا لما مراته قالت له فى ريحة دخان وهو طنش كلامها.                                                       
2. استعداد ووقايه وهنا لما تحس بالانذار المبكر بتعمل الاستعداد والوقايه عشان الازمه متحصلش بس طبعا صاحبنا هنا طنش الانذار المبكر الخطوه الاولى وبالتالى معملش الخطوه الثانيه وهنا طالما لم تطبق الخطوه الاولى والثانيه ستحدث الازمه وطالما حصلت الازمه متزعلش خلاص اللى حصل حصل عندك ثلاث مراحل عشان تحتوى الازمه.                                         
3. احتواء الاضرار بعد حدوث الازمه.                                    زى صاحبنا ما عمل كده قفل البوتاجاز وغسل الحله كويس ..الخوف حلو بردو.                                                               
4. استعادة النشاط مرة اخرى.                                              زى صاحبنا ما عمل راح جاب لبن تانى وعمل الشاى بلبن بتكاته وحركاته.                                                                            
5. التعلم من الازمه.                                                            زى صاحبنا كده هيركز مع اللبن كويس المره الجايه مايعملش فيها جدع تانى. 

وبكده ياسيدى نكون اتعلمنا المراحل الخمسه للمرور باى ازمه وكيفية التعامل معا قبل وبعد حدوثها وهذه الخطوات تطبق على اى ازمه ...خليك شطور كده طبق المراحل على الازمه الحاليه بتاعت الكورونا هتلاقيها ماشيه معاك حلاوه شغل الجى وروق الدى.

يلا اشوفكم فى مقال جديد وخفيف انتظرونى...