المحولات الكهربيه ..انواعها..طريقة العمل

بص ياسيدى قبل ما نتكلم ونقول اى حاجه عن المحولات الكهربيه عايز اتكلم فى حاجه خليك معايا...

طبعا بعد الدوره البخاريه اللى شرحناها قبل كده لو تابعتش ارجع شوفها فى المقالات السابقه مش هتخصر حاجه
فاكريين المولد افندى ..اكيد فاكرينه ده النجم بتاع الكهربه اللى مسخر الدوره البخاريه كلها تحت امره وعرفنى ازاى ..ارجع لمقال المولد تانى..قشطه كده

الجهد اللى طلع على اطراف المولد ده اللى هو 11kv ,او22kv انت تعرف ان ده جهد التوزيع اصلا ..ايه ده انت بتقول ايه ياعم....
اه المفروض انا زى الشطور كده اخد الجهد ده وادخله على محول تنزيل ووصل كهربه للبيوت ونعيش بقى 

ونهيص...استنى استنى امال ايه المحولات..امال ايه خطوط النقل ...امال ايه محطات التوزيع.....امال ايه كتيير.. ركز معايا بقى فى الزتونه دى

انت عارف عشان نعمل كده لازم نجيب الناس كلها تسكن جنب محطة التوليد ما هى هيصه بقى ...او فى حل تانى نعمل محطة توليد لكل منطقه سكنيه ..طبعا الحلين دول مستحليين ولا يمكن حدوثهم 

بص ياسيدى محطات التوليد هتفضل فى مكانها وبردو الناس هتفضل فى مكانها واحنا هندلعهم وهما فى اماكنهم..
خلى بالك بقى الجهد اللى طالع من المولد ده بيدخل على المحول الكهربى الرافع للجهد وهنا الدور الخطير للمحول الكهربى

المحولات الكهربيه

بص ياسيدى عشان نقدر نوصل الكهرباء الى الاماكن البعيده والناس اللى ساكنه فى اى مكان حتى لو مافيش محطة توليد فى المكان نستخدم المحول الرافع للجهد اللى بيعمل على رفع الجهد من 11kv الى 220 kv يعنى من الاخر بنعلى الجهد عشان يقدر يسافر معانا مسافات طويله...

الفكره هنا انك بترفع الجهد الى جهد الشبكه الموحده
اه اه الشبكه الموحده دى ان كل محطات التوليد اللى فى الجمهوريه مربوطه ببعضها عن خطوط النقل للكهرباء

ازاى ياعم الحاج ..اه والله زى ما بقولك كده لان كل محطات التوليد بعد ما بيطلع الجهد على المولد بيتم رفعه الى 220kv او سيان على جهد الشبكه فى اى  دوله من الدول..وبعد كده باخد من الشبكه وننزل عن طريق محولات تنزيل للجهد وهنا بقى التوزيع..فهمنا القصه هنا تعالى نتكلم بقى عن المحول الكهربى

المحولات الكهربيه Transformers

هى عباره عن جهاز كهرومغناطيسى ليست به اجزاء متحركه ويقوم بتحويل التيار المتردد ذو الجهد المنخفض الى تيار متردد ذو جهد عالى وبنفس التردد وده ياسيدى بنسميه محول رافع للجهد Stepup Transformer

او العكس بتحويل التيار المتردد ذو الجهد العالى الى تيار متردد ذو جهد منخفض وده بنسميه محول خافض للجهد Stepdown Transformer


 الغرض من استخدام المحول الكهربى

نظرا لتوليد القدره الكهربيه فى اماكن بعيده عن المستهلكيين لذلك تستخدم المحولات لنقل القدره الكهربيه بجهود مرتفعه الى اماكن استهلاكها ثم تخفض بعد ذلك الى جهود التشغيل. بنعيد ونزيد كل ده عشان توصل الفكره قشطه كده ولا ايه..

هل تعلم ....لا يعمل المحول على التيار المستمر لانه ينشأ عن مجال مغناطيسى ثابت وحيث ان ملفات المحول ساكنه فلا يحدث قطع لخطوط المجال المغناطيسى وبذلك لا تستنتح قوه دافعه كهربيه بالاستنتاج المتبادل الا فى لحظتى الفتح والقفل للدائره وحيث ان مقاومة الملف الابتدائى صغيره جدا فإنه تيار كبيير جدا يتسبب فى حرقها

ما النتائج المترتبه على نقل القدره الكهربيه بجهود عاليه؟

1. توفير ثمن الموصلات لانه بيتم استخدام موصلات بمقطع اقل 
2. رفع كفاءة خطوط النقل للقدره الكهربيه
3. توفير فى القدره المفقوده فى الموصلات وكذلك ثمن الطاقه الكهربيه المفقوده

عامتا بالنسبه للنقطه دى سنتحدث فيها لاحقا باستفاضه بس دلوقتى عشان بس نربط الدنيا ببعضها

وقاية المحول

وقايه المحول ياسيدى يتم تزويد المحولات بأجهزة تعمل على وقايتها من الاخطاء التى يتعرض لها المحول

يتم تقسيم الاجهزه دى الى قسمين

1. اجهزه الوقايه من الاخطاء التى يتعرض لها المحول من الداخل ومنها جهاز بوخلذ وهو المسئول على تنظيم منسوب الزيت المسئول عن التبريد داخل المحول
2. اجهزه الوقايه من الاخطاء التى يتعرض لها المحول من الخارج ومنها المتمم التفاضلى Differential relay, او متمم انعكاس القدره Power reverse relay
3. جهاز الوقايه للتسرب الارضى وكذلك جهاز الوقايه لزياده التيار over current relay 

بص متتعبش نفسك اوى اعرف اسمائهم بس وبعد كده ان شاء الله هنشرحهم بالتفصيل فى مقالات لاحقه

اشوفكم فى المقال الجاى ومعلومه سهله وبسيطه انتظرونى...